日本研究破解鸡蛋高胆固醇迷思！
发表于2020-07-14日本医生表示，其实胆固醇係分有好、坏功能，但世间偏向放大坏功能方面嘅影响，而经常避免吸收胆固醇。事实上，吸收过多胆固醇的确会因为停留喺血管壁，而导致动脉硬化，但同时，胆固醇亦都係製造体内约60兆个细胞嘅细胞膜所必要嘅材料，适量摄取胆固醇係有需要架！
医生亦指出，血液胆固醇嘅来源30％来自食物，70％来自肝脏分泌，而且肝脏嘅分泌量会自行调整。换句话说，从食物而来嘅血液胆固醇较多嘅情况下，肝脏就会分泌较少血液胆固醇，反之亦然。所以体内嘅血液胆固醇数值，相比起一餐食咩，更多数係取决于肝脏嘅运动。
之前曾有个医学调查，搵来1星期都冇1日会食蛋、1星期1~2日会食、1星期食3~4日、同几乎每日都食蛋嘅人进行血清总胆固醇浓度比较，发现数值相差只有极少数！咁点解会有食得多鸡蛋会高胆固醇嘅说法呢？
追溯番100年前俄罗斯学者所做嘅动物实验，将胆固醇餵畀兔仔食之后，出现咗动脉硬化症状，并因而断定胆固醇会对人体有害。然而，呢个就係所有误解嘅开端⋯⋯
兔仔係草食性动物，本来就不具备分解胆固醇嘅身体功能，就因为无法分解，先至会引致动脉硬化症状，对人体其实冇咩影响。
医生话，因为已经过咗100年咁耐，一个说法一旦被固定化，要推翻就好难，日本厚生劳动省成功推翻说法係2015年嘅事。鸡蛋，就咁被一只100年前嘅兔仔冠上咗「唔健康」嘅罪名⋯⋯
咁⋯一日可以食几多只蛋呢？医生指从饮食中摄取胆固醇嘅限制目标数值，其实係冇上限架！由饮食导致血液胆固醇量提高嘅呢个说法，原来係冇科学根据！即使食鸡蛋，血液胆固醇值都係唔会有变化。不过考虑到饮食平衡，医生建议一日食三只鸡蛋係最适量。
众所周知嘅脑退化症，係由于一种称为乙酰胆硷嘅物质含量减少而引致嘅，蛋黄中就含有称为胆硷嘅物质，可有效减低脑退化症嘅发病机率。
除鸡蛋以外，都有唔同食物係含有胆硷成分嘅，但鸡蛋中嘅含有量最为丰富，2只鸡蛋已经好比1块330g嘅牛扒！
而且日本好多鸡农会喺鸡粮当中加入「鱼粉」，用沙甸鱼製成DHA含量丰富嘅鱼粉，再餵给鸡只，DHA嘅营养值就会转移到鸡蛋里。DHA可有效提升认知能力、专注力、计划同解决问题技巧，对脑部帮助非常大！
据最新研究指，蛋白蛋白质係具有减肥效果！唔单止可有助燃烧脂肪，更可有效抑制脂肪于肝脏形成，最新嘅动物实验亦指出蛋白蛋白质有助对抗代谢症候群，帮助形成肌肉。
专家表示虽然配合运动一齐做可提升肌肉形成嘅效果，但单单只係摄取蛋白蛋白质便可促进肌肉形成。
有数据指出，持续每日摄取20g蛋白质，3个月后去除脂肪部分唔计，包括肌肉计算嘅结果中，观察对象嘅老人家体重增长咗1kg。但由于高龄者较难增生肌肉，所以专家推荐高龄人士每日摄取30g或以上蛋白质较好。
话就话叫蛋白蛋白质，但蛋黄都係好紧要架！调查发现，相比只食蛋白，食全蛋营养更丰富，肌肉嘅合成反应比只食蛋白高出30％！明明係同等份量嘅蛋白质，因咩差咁远呢？係因为蛋黄有丰富嘅维他命D，食全蛋有效防止肌肉老化。
专家指出，运动前唔应该食嘢，因为会令血液无法送到内脏，容易引起消化不良嘅症状。食鸡蛋嘅最佳方法係：1）同米、麵等糖质一齐摄取(糖尿病患者需徵求医生指示)、2）运动后先食。
日本人好锺意食生鸡蛋拌饭，相信唔少人去到日本，都有兴趣试一试日本鸡蛋有几新鲜美味，原来佢嘅食法都好讲究架！头先讲咗咁耐鸡蛋嘅营养价值，原来正确食用可防止皮肤同头髮老化！
蛋黄中含有嘅生物素对皮肤同髮质好，但蛋白中含有嘅抗生物素蛋白会妨碍生物素嘅吸收，将鸡蛋打匀会令营养流失！
蛋白中含有嘅抗生物素蛋白可经由热力破坏，而饭量够多嘅话就可以产生足够嘅热力，更容易破坏抗生物素蛋白，保留蛋黄嘅营养值。
而营养师就推荐用紫菜做生鸡蛋拌饭嘅topping。因为鸡蛋冇食物纤维同维他命C，而紫菜就刚好补充咗呢啲营养。
鸡蛋中白色嘅纽状物其实係卵黄系带，含有良性蛋白质之余，仲有抗癌药中会出现嘅唾液酸成分，医生推荐食埋佢！下次食鸡蛋唔好挑走佢啦！
你有冇试过烚完水煮蛋，剥壳时仲有层薄膜黏住，好难撕又唔好咬口？原来嗰层膜叫蛋壳膜，根据最新研究，呢层膜可有助抑制炎症，同有效改善肝机能，建议大家食埋佢！
医生教你唔使打只蛋出嚟，就可以知道只蛋仲新唔新鲜嘅方法：将鸡蛋放入盐水。如果只鸡蛋放得太耐，已经唔新鲜嘅话，佢会因为蛋内有空气而浮于盐水上，而新鲜嘅蛋会向下沉。
鸡蛋底部较圆嘅部分称为气室，係鸡蛋进行呼吸嘅部位，要保持鸡蛋鲜度嘅话要将较尖嘅部分朝下摆放。如果将鸡蛋上下翻转，较尖嘅部分朝上摆放嘅话，蛋黄下沉会阻碍呼吸，令鸡蛋加速劣化。以后买蛋记得要留意啦！
